Bydd ffenestr gyflwyno Cyhoeddiadau’r Stamp yn agored i waith newydd rhwng 1 a 31 Mai 2025

**Peidiwch a chyflwyno gwaith cyn 1 Mai 2025 - dim ond gwaith sy’n cyrraedd o fewn y ffenest fydd yn cael ei ystyried ar gyfer rhaglen gyhoeddi 2026-27.

Cyn i chi gychwyn, cymrwch olwg ar ein tudalen Cwestiynau Cyffredin er mwyn ymgyfarwyddo â’n gofynion, ein gwerthoedd a’n gweledigaeth.

Ar gyfer yr alwad hon, rydym yn gofyn i chi gyflwyno:

• pamffledi barddoniaeth (hyd at 15 cerdd)

• cyfrolau o farddoniaeth (dros 20 cerdd)

• gweithiau rhyddiaith byr (ffuglen neu ysgrifau, hyd at 10,000 gair)

• pamffledi celf (pwyslais ar waith gweledol)

• sgriptiau dramâu (sy’n ymestyn i uchafswm o oddeutu 10,000 gair; cyhoeddir dramâu yng nghyfres Sgriptiau Stampus, a gallant fod yn ddramâu sydd wedi’u llwyfannu neu beidio)

Dylech anfon:

• eich enw a’ch cyfeiriad e-bost; does dim angen cynnwys manylion bywgraffiadol, a pheidiwch â chynnwys eich enw o fewn y gwaith creadigol ei hun

• sampl o 5 tudalen A4, naill ai o ryddiaith, o farddoniaeth, neu waith celf (neu gymysgedd o’r tri!)

• dylech ddefnyddio ffont maint 12, gyda bylchau dwbl ar gyfer rhyddiaith, a chyflwyno ar ffurf dogfen Word neu PDF

• hanner tudalen o ddisgrifiad o’r prosiect, neu gyfwerth ar ffurf recordiad sain neu fideo

Dylid nodi fod croeso i chi yrru mwy nag un cynnig, ond y byddwn yn darllen uchafswm o dri, ac na fyddwn yn dewis mwy nag un gyfrol gan yr un awdur o fewn rhaglen gyhoeddi un flwyddyn. Cofiwch fod gweithio ar un cysyniad cryf yn well o lawer na brysio tri gwahanol.

Gyrrwch yr uchod at cyhoeddiadau.ystamp@gmail.com, gyda FFENESTR GYFLWYNO fel pwnc, erbyn hanner nos, nos Sadwrn 31 Mai 2025.

Rydym yn ffafrio derbyn gohebiaeth e-bost, ond os dymunwch, gallwch hefyd bostio eich gwaith at Cyhoeddiadau’r Stamp Cyf., Bron Llewelyn, Lon Ceunant, Waunfawr LL55 4SD. Ni allwn gymryd cyfrifoldeb am waith nad yw’n ein cyrraedd trwy ddamwain, felly os am sicrhau ei fod yn glanio’n ddiogel, gyrrwch e-bost i gadarnhau ac os yn bosib, defnyddio gwasanaeth postio sy’n gofyn am lofnod gan y derbynydd.

Mae’n bosib y byddwn yn cysylltu â chi i ofyn am sampl hirach cyn i ni ddod i benderfyniad terfynol.

>> FFENESTRI CYFLWYNO

Nid ydym yn derbyn gwaith y tu allan i’n ffenestri cyflwyno erbyn hyn. Mae hyn oherwydd yr angen i gynllunio ein rhaglen gyhoeddi, ac er mwyn gwneud yn siwr fod pawb sy’n cyflwyno yn cael cyfle teg. 

Gofynnwn felly eich bod yn cadw llygad ar y cyfryngau cymdeithasol ac ar y wefan hon, lle byddwn yn datgan pryd byddwn yn agor ar gyfer cyflwyniadau.