Newyddion: Cyfres bamffledi Eisteddfod yr Urdd

Mewn cydweithrediad ag Eisteddfod yr Urdd, mae Cyhoeddiadau’r Stamp yn falch o gyhoeddi cyfres newydd o bamffledi blynyddol fydd yn rhoi llwyfan teilwng i waith enillwyr y prif wobrau llenyddol – y Fedal Ddrama, y Gadair a’r Goron.

Os bydd teilyngdod, bydd y pamffledi hyn ar gael yn syth wedi’r defodau dyddiol – y Fedal Ddrama ar ddydd Mawrth 28 Mai, y Gadair ar ddydd Iau 30 Mai, a’r Goron ar ddydd Gwener 31 Mai. Mae’r wasg wedi comisiynu’r artist o Faldwyn – ac un o guraduron Gŵyl Triban 2024 – Aur Bleddyn, i ddylunio cloriau i’r pamffledi mewn ymateb i’r waith yr enillwyr.

Dywedodd Iestyn Tyne o Gyhoeddiadau’r Stamp:

‘Nid syniad newydd ydi hyn, wrth gwrs, ac rydan ni’n cymryd llawer o ysbrydoliaeth ar gyfer y gyfres o’r pamffledi yr arferai’r eisteddfod eu cyhoeddi rhwng y 50au a’r 70au; pamffledi oedd ar gael ar ddiwedd pob seremoni fel bod modd darllen y gwaith yn syth’.

‘Mae’n hawdd anghofio yng nghanol y cyffro mai’r gwaith llenyddol ei hun sydd wrth graidd y cyfan, ac mai cyrraedd cynulleidfa gyda’r gwaith hwnnw ydi un o brif fanteision ennill gwobr o’r fath.’

Ysgrifau’r Goron, Eisteddfod yr Urdd Porthmadog 1964

Bydd pamffledi hefyd yn cael eu dadfocsio yn dilyn cyhoeddi enw’r enillydd o’r llwyfan yn siopau stampus Palas Print, Caernarfon; Awen Meirion, Y Bala; a Cant a Mil, Caerdydd. Byddant ar gael o’r holl siopau eraill ble caiff Cyhoeddiadau’r Stamp eu stocio yn ystod yr wythnos ddilynol.

Bydd enillwyr prif gystadlaethau llenyddol Eisteddfod yr Urdd yn derbyn y cyfle i fynychu Cwrs Olwen yng nghanolfan ysgrifennu Tŷ Newydd. Ar gwrs o’r fath y daeth criw’r Stamp at ei gilydd am y tro cyntaf a chyd-dynnu dros y freuddwyd o greu gofod amgen i lenyddiaeth Gymraeg.

‘Mae’n gyffrous iawn cydweithio gyda Cyhoeddiadau’r Stamp i sicrhau fod gwaith ein prif enillwyr yn cyrraedd y silffoedd llyfrau’, meddai Llio Maddocks, Cyfarwyddwr Celfyddydau’r Urdd, ‘rwy’n annog pawb i fynd a phrynu’r cyfrolau hyn, a dathlu pwysigrwydd geiriau ein pobl ifanc’.

Cerdd y Gadair, Eisteddfod yr Urdd Pontypridd a’r Cylch 1973